Polica e sigurimit ‘Swiss Visual Pro’ do t’i jepet falas 300 klientëve të parë që financohen me Kredinë Ekspres pranë Bankës Societe Generale Albania. Kjo policë i mundëson të siguruarve individë një pagesë të menjëhershme fikse prej 300,000 lekë në rast të dëmtimit të plotë të banesës nga tërmeti. Për vitin e parë primi i kësaj police do të mbulohet 100% nga Banka.
Duke filluar nga data 5 Shtator 2017 300 klientë të Bankës Societe Generale Albania mund të kenë sigurimin e tyre nga tërmetet falas për një vit. Pas vitit të parë klientët mund të zgjedhin nëse duan të vazhdojnë mbulimin e drejtpërdrejtë me kompaninë Albsig.
Shërbimi mundësohet nga Programi i Sigurimit të Rrezikut nga Katastrofat Natyrore në Europën Juglindore, financuar nga Sekretariati Zviceran i Shtetit për Çështjet Ekonomike (SECO) dhe nga Banka Botërore. Ky program synon ndërgjegjësimin e popullatës për sigurimin e pronës ndaj tërmeteve.
Për shkak të pozicionit gjeografik Shqipëria është e rrezikuar nga tërmetet si pasojë e aktivitetit të lartë sizmik. Studimet më të fundit e vendosin Shqipërinë ndër vendet më të rrezikuara të rajonit së bashku me Greqinë dhe Turqinë. Megjithatë vetëm një pjesë e vogël e popullsisë kryen këtë lloj sigurimi. Autoritetet dhe institucionet ndërkombëtare po bëjnë thirrje që popullatat në vende si i yni të sigurojnë pronat nga tërmetet pasi përndryshe pasojat ekonomike dhe sociale do të ishin të rënda.
Ky shërbim përveçse i përgjigjet nevojave reale të klientëve, synon të rrisë edhe ndërgjegjësimin e qytetarëve shqiptarë mbi nevojën e sigurimit të ndërtesave në raste katastrofash.
Europa Re, Zyra e Përfaqësimit në Shqipëri
Tel: +(355) 4500 675
