Eidgenössisches Departement für
auswärtige Angelegenheiten EDA

Da Berna a Madrid per la «Settimana della lingua italiana nel mondo»

Il Departament federal d'affars exteriurs profita da la «Settimana della lingua italiana nel mondo» per dar l'attenziun a la terza lingua naziunala. En il center stattan las collavuraturas ed ils collavuraturs dal DFAE che preschentan respectivamain fan endament il patrimoni linguistic e cultural da la Svizra taliana. Rapports da Berna e da Madrid.

18.10.2021
EDA
Das Nevercrew-Wandbild  befindet sich in einer Strasse im Zentrum von Madrid. Eine Frau betrachtet das Bild interessiert von ihrem Fenster aus.

Fastizs da la Svizra taliana a Madrid: Il duo d'artists tessinais Nevercrew ha stgaffì il maletg da paraid «Offset» per l'Urvanity 2020 Art Fair. © Nevercrew

Zum Artikel in deutscher Sprache.

11.45 a Berna. En in edifizi da l'administraziun federala èn collavuraturas e collavuraturs da lingua franzosa e tudestga dal Departament federal d'affars exteriurs (DFAE) pronts per lur curs da talian. Els exerciteschan la lingua taliana en ina discussiun davart Dante, il tema da la «Settimana della lingua italiana nel mondo» che dura dals 18 fin ils 24 d'october 2021. Il cusseglier federal Ignazio Cassis fa ina visita al curs ed engrazia a las participantas ed als participants a chaschun da la «Settimana» per lur engaschament a favur da la plurilinguitad. 

Il cusseglier federal Ignazio Cassis visita in curs da talian en il DFAE.

La promoziun da la plurilinguitad en Svizra tutga er tar ils puncts centrals dal dialog politic structurà che Ignazio Cassis maina cun ils chantuns Grischun e Tessin.

«Talian: in ferm toc Svizra»

La devisa «Talian: in ferm toc Svizra» en tut las quatter linguas naziunalas. Sin il fund ina copia da la charta naziunala da la Svizra
La promoziun dal dialog intercultural è pia in punct central da la diplomazia svizra. © EDA

Sut questa devisa s'engascha il DFAE per promover la terza lingua naziunala. «Var tschient collavuraturas e collavuraturs dal DFAE profitan da la purschida d’emprender talian a la centrala a Berna. Latiers tutgan curs da lingua, ateliers da scriver e webinars», declera Antonella Di Fusco, collavuratura scientifica da la secziun Egualitad da las schanzas e dumondas globalas da las schlattainas DFAE.

A l'exteriur è la Svizra preschenta cun 170 represchentanzas e cun var 2300 collavuraturas e collavuraturs. La diversitad da las linguas discurridas, supplementarmain a las linguas naziunalas da la Svizra, è gronda. La promoziun dal dialog intercultural è pia in punct central da la diplomazia svizra.

La Svizra da l'autra vart dals cunfins: ina inspecziun a Madrid

Las ambassadas svizras en il mund èn ina funtauna unica per survegnir invistas da la lavur da persunalitads da lingua taliana. Vanessa Reichmuth Pozzo ed Alberto Giovanetti, ina collavuratura ed in collavuratur da l'ambassada svizra a Madrid ch'è cumpetenta per la Spagna e per Andorra, ans accumpognan sin in tur interessant. En la chapitala da la Spagna ans mussan els fastizs d'artistas ed artists da la Svizra taliana, per exempel il maletg da paraid «Offset» dal duo d'artists tessinais Nevercrew, ch’è situà betg lunsch davent da l'ambassada svizra.

La collavuraturas ed il collavuratur da l'ambassada svizra a Madrid, Alberto Giovanetti e Vanessa Reichmuth Pozzo, ans accumpognan tar il maletg da paraid da Nevercrew..

L'ambassada svizra per la Spagna e per Andorra sco er il consulat general a Barcelona sustegnan mintga onn occurrenzas per promover la lingua taliana. Quest onn sa participeschan l'ambassadur svizzer Hanspeter Mock ed il cusseglier d'ambassada per scienza e per cultura, Alberto Giovanetti, ad ina prelecziun permanenta da Dante che vegn realisada en il Círculo de Bellas Artes a Madrid. «A la prelecziun sa participeschan numerusas collavuraturas e numerus collavuraturs d'autoritads spagnolas e da represchentanzas estras», declera Alberto Giovanetti.

Vegni a savair dapli latiers en la Swiss Story sin houseofswitzerland.org: «Spaziergang durch Madrid im Zeichen der Kunst und der italienischen Sprache».

Intervistas da video cun architects tessinais a New York, ils quals mussan la relaziun da la lingua taliana cun l'Archtober, il mais d'architectura e da design en la metropola; ina prelecziun davart dialects talians a l'universitad d'Atlanta; prelecziuns d'auturas ed auturs oriunds da la Svizra taliana da Tunis fin Santiago: Quai èn mo in pèr da las purschidas, cun las qualas las ambassadas svizras ed ils consulats svizzers illustreschan la diversitad culturala da la Svizra a l'exteriur. En vista a la «Settimana della lingua italiana» durant l'october 2022 sa legran las represchentanzas svizras en tut las regiuns dal mund gia oz da dastgar preschentar novas scuvertas ed iniziativas.

Zum Anfang